हरि आचार्य, कपिलवस्तु
पिपरा कोठी महिला सेवा सामुदायिक वन उपभोक्ता समुहले महिलाहरुलाई २ दिने क्षमता अभिवृद्धि तथा नेतृत्व विकास तालिम प्रदान गरेको छ । सामुदायिक वनको चालु आर्थिक बर्षका लागि स्वीकृत महिला सशक्तिकरणको कार्यक्रम अन्तर्गत महिलाहरुलाई उक्त २ दिने तालिम प्रदान गरिएको हो । तालिममा उद्घोषण, सार्वजनिक भाषणकला, नेतृत्व विकास सम्बन्धि पत्रकार हरि आचार्यले प्रशिक्षण दिनुभएको थियो ।
उद्घाटन कार्यक्रमका प्रमुख अतिथि सव डिविजन वन कार्यालय पिपराका प्रमुख मोहन मिश्रले सामुदायिक वनले काठ दाउरा बिक्रि मात्र नभई महिला सशक्तिकरण सहित भौतिक विकास निर्माणका कार्यहरु गर्दै वन संरक्षणमा ध्यान दिनुपर्नेमा जोड दिनुभयो ।
समापन कार्यक्रमका प्रमुख अतिथि बाणगंगा नगरपालिकाका प्रवक्ता तथा वडा नं. २ का वडाध्यक्ष बिष्णु प्रसाद पौडेलले तालिमले महिलाहरुको क्षमता विकास भएको पाएको बताउनुभयो । यस्ता कार्यक्रम वडा र सामुदायिक वनले समन्वय गरेर गर्ने बताउनुभयो । पौडेलले भौतिक विकास निर्माणले मात्र विकास नहुने भन्दै सामाजिक रुपान्तरण सहितको विकास आवश्यक रहेको बताउनुभयो ।
तालिममा सहभागी सृजना विसी र श्वेता ज्ञवालीले वनले यस्तो तालिम प्रदान गरेकोमा खुसी व्यक्त गर्दै आगामी दिनमा पनि यस्ता खालका कार्यक्रम गर्नुपर्नेमा जोड दिएका थिए ।
सामुदायिक वनका अध्यक्ष रत्न बहादुर कार्कीले सामुदायिक वनले विगत देखिनै महिला सशक्तिकरण संगै कृषि लगायतका कार्यक्रम गर्दै आएको बताउनुभयो । अध्यक्ष कार्कीले तालिममा सिकेको ज्ञानलाई व्यवहारमा लागु गर्नुपर्नेमा जोड दिनुभयो ।
उद्घाटन कार्यक्रममा वनका सदस्य सोनमति चौधरीले स्वागत मन्तब्य दिनुभएको थियो भने वनका कोषाध्यक्ष हिरालाल घिमिरेले मन्तब्य राख्नुभएको थियो ।
वनका अध्यक्ष रत्न बहादुर कार्कीको अध्यक्षता, सचिव बाबुराम घिमिरेको संचालनमा सम्पन्न कार्यक्रममा वनका कार्यसमिति पदाधिकारी, सदस्य तथा उपभोक्ता महिलाहरुको उपस्थिती रहेको थियो ।
