थानेश्वर अधिकारी, कपिलवस्तु ।
कपिलवस्तुमा कोरोना भाइरस संक्रमणको रोकथाममा सामाजिक संघसंस्थाले प्रत्यक्ष सहयोग पुर्याउदै आइरहेका छन् । कोरोना भाइरस (कोभिड १९) बारे जनचेतना, राहत सहयोग तथा कोरोना भाइरसको रोकथाम र नियन्त्रणमा अत्याबश्यक स्वास्थ्य सामग्री वितरणमा संघसंस्थाले सहयोग गर्दै आएका छन् । यसै सन्दर्भमा जागृति बाल तथा युवा सरोकार नेपालको सहयोगमा शनिवार कपिलवस्तु जिल्लाका २ वटा स्थानिय तहमा ५ लाख ६० हजार बराबरको स्वास्थ्य सामग्री हस्तान्तरण गरिएको हो ।
यस अघि पनि यु.एन्.एफ.पि.ए.को सहयोग तथा सिद्धार्थ सामाजिक विकास केन्द्रको समन्वयमा कपिलवस्तु जिल्लाको शुद्धोधन गाउँपािलका, मायादेवी गाउँपालिका, कपिलवस्तु नगरपािलका र महाराजगंज नगरपालिकाको क्वारेन्टाइमा बसेका १५ जना महिला तथा ६ जना किशोरीहरुलाई मर्यादा र किशोरी किट हस्तान्तरण गरिएको सिद्धार्थ सामाजिक विकास केन्द्रका पूर्व अध्यक्ष तथा अधिकारकर्मी पोमनारायण पौडेलले बताएका छन् ।
जिल्लाका क्वारेन्टाइनमा बस्नेको संख्या बढ्दै गइरहेको र अत्यावश्यक स्वास्थ्य सामग्रीको अभाव भइरहदा आवश्यक सहयोगका लागि विभिन्न निकायबाट सहयोगका लागि पहल भइरहेको छ । यशोधरा र विजयनगर गाउँपालिकाको माग बमोजिम संस्थाले स्वास्थ्य सामग्री हस्तान्तरण गरेको जागृति बाल तथा युवा सरोकार नेपालका अध्यक्ष तिलोत्तम पौडेलले बताए । संस्थाले प्रति गाउँपालिका टप ग्लब्स ५० पकेट, पेपर मास्क १००० पिस, मास्क केएन ९५ पचास पिस, सेनिटाइजर ५० बोटल, पिपिई सेट २५ थान र इनफ्रेड थर्मामिटर १० पिस हस्तान्तरण गरेको हो ।
२ पालिकाका प्रतिनिधीलाई जागृति बाल तथा युवा सरोकार नेपालको सहयोगमा सिद्धार्थ सामाजिक विकास केन्द्रले समन्वय गरी संस्थाको कार्यालयमा हस्तान्तरण गरेको थियो । हस्तान्तरण कार्यक्रममा संस्थाका अध्यक्ष तेज प्रसाद आचार्य, सचिव रोमकान्त घिमिरे, पूर्व अध्यक्ष पोमनारायण पौडेल लगाएतको सहभागिता रहेको थियो ।
